Sunday, July 27, 2008

做個決定

人越大,反而對好多嘢猶疑左。

上網 search "decision making",有成千上萬個 methodology。有叫你畫圖分析去算盡天機的,有鼓吹憑本能「眨下眼」就做決定嘅,又有啲叫你要深思熟濾嘅… 點都好,做左「十幾廿年」人,理論上應該有番咁上下閱歷,做決定時應該越嚟越成熟兼快手先啱。

但係點解好似係現實世界係剛剛相反?身邊有朋友「一腳踏兩船」,唔知要同「二奶」遠走高飛好,定番轉頭去修保已經千瘡百孔嘅婚姻好。結果拖下拖下,瞞下瞞下,一年又一年咁過。又有朋友成日諗,究竟應該留係間穩定但係悶到發瘟公司等退休好,定係出去轉工搏一搏搵真銀好…話唔定做十年八年之後就可以唔洗撈喎。諗下諗下,不如等出左 bonus 先算喇~ 結果等下等下又過左幾年,年年都係「等出左 bonus 先」。

係人大左,遇到啲問題越嚟越複雜吖,定係經驗越多,越要多啲時間反複去諗?其實,可能只係大家都怕要承擔後果吧。

係人都有試過做錯決定…有時睇番轉頭,會諗 "what if…", 又會諗「如果當初…」等等。後悔得多,就會發現面對新問題時,做決定會越嚟越猶疑。因為,試果做錯的後果,怕怕了。

記得有次同朋友吹水,佢失驚無神爆左句:「x,有咩好後悔…你自己揀嘅!」

就咁聽落去好似冇咩「玄機」,兼有啲冷血。但諗深一層…又係喎。有時啲嘢,真係要「打落門牙和血吞」的。有時左諗又諗,問下朋友意見。啱聽嘅,只係叫就有啲心理安慰,有啲支持咁。唔啱聽嘅,反而攪到自己仲唔知點好。

其實到頭來如果發現做錯左,要承擔後果嘅,又咪係得自己。

人思考,好多時只係因為自己「想」去咁諗。因為想快樂,所以諗好唔好去搵「二奶」。因為想發達,所以諗轉工。咁諗法,齋諗一世都唔會有結果 — 直到你真係去試下先知…

不過…現實真係咁?一個人冇幾多個「十幾廿年」…錯左唔係下下都可以番轉頭…死,又有啲猶疑…

4 comments:

dc said...

做決定最難唔係怕後果, 好多野以前認為係好事, 宜加都未必肯定, 何況好多野無確定性...

cc said...

就係因為以為自己所諗/估計o既遠景係o岩,所以就會覺得個決定有風險lo,跟手就評估埋自己承唔承擔得起 ...
小朋友做決定好快,因為無乜經驗又無乜資訊,單單憑gut feeling,跟住人大左呢,經驗多左之餘識o既o野又多左,於是會因為好/太多o野諗,做決定變得十分之猶豫。
可能gut feeling先至係好o野,至少用少o的腦汁,當下又開心左 ... 賺晒 ~ :P ~

dc said...

據說直覺係潛意識分析既結果, 不過唔知幾時係直覺幾時係錯覺...

dc said...

just read the famous economic statement again:
Cost is the best opportunity foregone.
無犧牲就無代價,無選擇亦無代價,d人就係因為怕犧牲,變成怕選擇結果就係乜都無。