Monday, January 15, 2007

Hyderabad Day 1

今日又再次証實左我成日話自己「係邊都訓得著」既一番話並唔係吹水既。今朝一覺訓到天光, 要手機 alarm 響先醒,仲好訓過係屋企。

照例起身沖涼,沖沖下先發現死火!事關個電熱水爐唔多掂,沖到半路居然冇熱水。仲要唔知係咪朝早多人用電,試過有兩下停電十幾秒。最後唯有做一樣我好耐冇做既野:沖凍水涼!得個廿度到炸,陰公!

之後係屋入面行黎行去,等印度同事黎接我。俾我發現左間屋一樣得意野… 不過呢d小事遲d有時間先講。

上午set 機,見下其他同事,開下會咁,好快就過。午餐跟同事去 canteen,佢請。食印度野(廢話)。我跟佢一樣食 veg。有簿餅,用咖喱薯仔同唔知咖喱咩送… ok lar。 30 盧比(大概6蚊港紙)想點?

下午答左幾個印度同事問題,同香港開下 phone conference,覆下mail,忙下忙下又放工喇。個印度同事又好好人咁車我去買糧水。番到住個到竟然條匙開唔到度門!攪左一輪都開唔到,抱住幾升水跑落樓問 secure 哥哥,又聽唔明我講咩。最後 call 屋主。好彩佢原來就住係樓下。佢一上黎,兩三下手勢就開左度門。原來度門要一路轉匙一路拉住某到先開到……

最後要介紹既係聽過好多次,但係我從未試過既 —— 印度即食麵!! 咁又攪掂夜晚個餐喇。




PS. 唔洗驚,d 壹週係響香港機場買既

No comments: