Clarence's Wicked Mind

「男士應否替女士挽手袋」。一個應該係辯論一世都冇結果o既題目。

早兩日出席左朋友o既婚宴，而當中做伴郎o既係另一位相識o既朋友。只見席間，做伴郎o既朋友一直為伴娘拎住個晚裝手袋。注意： (1) 呢位伴郎朋友乃出名（亦自認）色中餓鬼; (2) 伴郎同伴娘係幫手準備呢場婚宴前，係並不認識的說。 -_-

入番正題。「男士應否替女士挽手袋」。正方代表（通常係女性）會話，咁係男士風度o既表現。就好似男士應該要為女士落車時開車門，落雨時擔遮一樣，好正常喔。 而反方（大男人？）會話男人老狗，拎住個女人手袋通街走係有損尊嚴兼市容喎。

其實，當你的朋友或女伴有需要時，唔理係唔係拎手袋，出手幫忙又有咩唔妥？尤其係當你的女伴要上洗手間、入試身室、或者係季尾減價掃貨時，幫她拎一拎個手袋又何嘗不可？（不過，話說回頭。當你見到女廁門口有一大班男士拎住手袋係到等o既場面，你都咪話唔好笑…）

男士，其實怕o既係一開始幫女士拎手袋，就顯得雄風減弱，驚從此就咁俾個女仔「食住」。

女士呢，其實好多時都唔係要男仔真係幫佢拎手袋。佢地只係想知道個男仔「肯唔肯」拎。到個男仔真係想幫手拎時，反而會話唔洗… -_-

最理想o既情況係：一位男士好禮貌咁問位女士需唔需要幫手挽手袋。女士嫣然一笑咁答：「唔洗喇~」… 咁男o既就顯出左風度，而女o既就可以繼續拎住個成萬銀o既手袋襯番件衫… :P