Sunday, September 23, 2007

四部戲

係剛過去的一個禮拜,睇左四部戲。好耐都冇試過咁樣「煲碟」法。

先睇左朋友借俾我既 Life is Beautiful 。睇之前並唔知到原來係二次大戰片黎。老實講,如果淨係睇開場個十幾分鐘的話,真係會以為睇緊鬼佬版「周星星」d 戲。個故事係圍繞二次大戰時,主角點樣用樂觀的態度,令佢身邊既人,特別係佢個仔同太太,渡過難關。比起 Schindler's List,呢部戲冇咩煽情場面。同 Saving Private Ryan 比,又連一個荷里活式的大場面都冇。對猶太人所受的逼害,套戲都係用一 d 隱喻的鏡頭表達。例如集中營的人會討論老弱的人會被騙去洗澡,其實係被送入毒氣室。跟著鏡頭會見到德軍送一大班人平靜地行入「澡堂」,然後鏡頭一轉,只係見到煙囱噴出大量黑煙。所有「慘情」場面的處理都係隱隱約約的,可能是要突出主角的樂觀性格。但呢 d 都冇減少呢部戲的震撼性。總括黎講,唔錯。

跟住睇既就真係周星馳既戲 — 「功夫」。冇咩好講。純粹一部可以 shutdown 個腦睇既戲。ok 喇。想睇既原因係,早前和同事一齊食飯時,大家飲到 high high 地,係到笑某同事「可以好似肥仔聰咁係心口劃對斧頭」,於事想睇睇係咩一回事。雖然之前有人話呢部戲係想帶出什麼「本領愈大的人,責任愈大」的訊息等等。不過…算把喇,當係「周星星」既戲睇咪算囉。

再跟住睇既係 Babel 。香港上畫時譯做「巴別塔」。記得細個讀聖經故事,巴別塔的故事係講原本人類係用同一語言的。當時大家想建造一座塔直達天堂,以為自己可以同神相比。於是神決定變亂世上的語言,令大家不能溝通,最終建唔成座塔。部戲圍繞住四個家庭的事,不停 back and forth 咁跳黎跳去。大家都好似冇關係,但其實每件事最終係由另一件事帶出黎。套戲有英語,日語,西班牙語,阿拉伯語場面。真係有 d 「巴別塔」 feel。不過,唔同語言唔係最大既問題。部戲帶出的訊可能係,要真正做到「溝通」得到先係最大的問題。仲有,係好多地方上,套戲都冇正式交待到前因後果…不過都好,有 d 位俾人去諗諗。唔錯唔錯。

最後一部係 300。又係唔洗點用腦的。 CG 勁。場面血腥震撼。純觀能刺激。正正正!

2 comments:

cc said...

「場面血腥震撼」,咁我一定唔會睇300!
巴別塔我未睇過呢,之前都聽過朋友的評價不錯,有o的興趣 ... 不過睇個poster好似好陰深咁,驚唔驚o架?:o ~~

禽晚睇重播的face off,唔係第一次睇,仍然覺得好緊張,哈哈!

dc said...

功夫都唔錯, 不過都係零零漆最正~

babel都係唔太表達到個信息既

我唔太鍾意300 d慢動作, 搞到無咁爽... btw, 我個frd話唔應該叫戰狼300, 應該叫戰狼30, 因為來來去去都係得果廿幾條友係度打... XD

鍾意血腥可以睇睇planet terror 同 dealth proof, 尤其 dp, 真係幾爽~